صراع الأ جيال ....

::: واحد :::
الجيل الأول الممثل بالأب والأم لا يطيق إذا كان فايق أن يرى الجيل الثاني وهم الأبناء نايمين !! ومو هون المشكلة....لأن الجيل الأول ما حيخليها بقلبه حرقة وحيقرر يفيق الجيل الثاني بس كمان مو هون المشكلة طالما بيفيقوا بشكل طبيعي نوعاً ما...ولكن للجيل الأول طريقته الخاصة ولها طعمها المميز ونكهتها الخاصة وهي بأن يقف فوق رأس الجيل الثاني ويبدأ الموشح التالي :
أولاً الأب لابنه...لسه نايم يا لوح....قوم ادرس...لكن بدك تسهر طول الليل وتقضيها نوم بالنهار...أي طبعاً يا مدلل أمك.... أكل ومرعى وقلة صنعة والله لو صحت لجدي ما كان مات
وهلأ الأم وبنتها...قومي يا خانم حيأدن العصر (( مع العلم لسه الساعة 11...بس يمكن ساعة الوالدة بتوقيت غرينتش)) لك قومي حاجتك نوم وخمخمة...أي لكن مكتوب ع ورق الخيار يلي بيسهر بالليل بينام بالنهار....والله ويلي أسمه الله لشيل عيونك إذا بتسهري من اليوم ورايح....لشوفك بكرة بس تصيري ببيتك جوزك شلون بدك تقومي من ((.......)) الصبح لتلحقي شغل البيت.........الخ
ولكن والجدير بالذكر هنا بأن الجيل الثاني بيكون فاق من بداية الموشح وعم يأكل حاله وللتذكير أيضاً أنا بهذه الموشحات كلها فوق راس حدا نااااااااايم

يكون الجيل الثاني جالساً يشاهد التلفاز ومندمج عالاخر (( ع شي فلم ... مسلسل...يلي هو)) وبأمان الله ومن غامض علمه وعلى مبدأ يا غافل إلك الله ويا اعدين يكفيكون شر الجايين بتلاقي الجيل الأول بيفوت ويمسك بجهاز التحكم ويغير المحطة ويرفع الصوت ويبز بط قعدته وبيتركن
وببساطة تبدأ الأوامر....وليك مقصوفة الرقبة نتتري ساوي قهوة....وأنت ولا فوت جيب كيس البزر...!!!!

بما أنو الجيلين يعيشان في المنزل ذاته فمن الطبيعي بل أكثر من طبيعي أن يستخدموا الغرف نفسها و بالتناوب.. خاصة المطبخ و الحمام بما أنها تندرج تحت خانة المرافق العامة... لكن إذا
قرر الجيل الأول دخول الحمام مثلا ً ووجد الباب مقفل صرخ بعنف (( مين في بالحمام..؟))
فيجيب الجيل الثاني بخوف عفوي أنا (( أنا )) فيرد الأب بثقة متناسياً نداءات الطبيعة والأشياء التي لا تخضع للسيطرة وبطريقة آمرة (( أي يلا طلاع بسرعة...يلا شو ما عم تسمع))
" لك بس سؤال شو خص حاسة السمع بهيك حالة.....!!!! "
وأما الأم والتي تعتبر المطبخ مملكتها....في تنام وتهدس بممتلكاتها داخل المطبخ (( الكبجايات 4...ودولات القهوة 3....وصحون.........الخ)) وإذا سمعت صوت طرطقة بالمطبخ تصرخ (( طبعاً بعد ما تقوم من أربعتها ))
الأم : ولك مين بالمطبخ....
أحدالأولاد : أنا.......
الأم : ولك شو عم تساوي عندك ؟؟؟
"" يعني دخيل الله شو هـ السؤال المنطقي......واحد بالمطبخ شو بدو يساوي ....!!!! ""

يرفع الجيل الأول سماعة الهاتف (( ليحكي طبعاً )) ويبدأ بضرب الرقم غير آبه بنداءات الاستغاثة الصادرة من الجيل الثاني.....
الابنة : بابا...بابا....عم أحكي
الأب : مستغرباً ومستنكراً وغاضباً....إي يلا سكري بدي التلفون
ويبقى الجيل الأول رافع السماعة للحظات ليتعرف على نوع المكالمة ثم يغلقها لمدة ثانية إلا نصف ومن ثم يرفعها من جديد وبلا أحم وبلا دستور يصرخ (( فضولنا هـ الخط بأأأأأأأأأ ))

يحاول الجيل الأول مراقبة الجيل الثاني فيضعه تحت الرقابة أحياناً المراقبة المباشرة وأحياناً المراقبة غير المباشرة ولأن الجيل الأول مؤمن إيماناً مطلقاً بأننا نحن الجيل الثاني جيل صغير ومتهور وطائش وغير قادر على أن يكون وحده...يعتمد هون بقا الجيل الأول على خطة (( نحن أصدقاء )) والتي تعتمد على مبدأي (( الحوار والصراحة )).......الفلم :
الأب : بابا اعتبرني صديقك وأفتحلي قلبك..........شبك ؟
الأب : يا بابا بيقول المثل إذا كبر أبنك خاويه.......فهات لشوف لك بابا خبرني.......
الأم : يا ماما يا تقبريني أنا أمك وما حدا بحبك وبخاف عليكي قدي..هاتي أحكيلي لشوف...
وطبعاً أنتم أدرى ببقية القصة فما أن يصدق الجيل الثاني هذه الخدعة ويبدأ بالتكلم وبصراحة.....حتى أأأأأخ...(( تنذكر وما تنعاد ))

يتعامل الجيل الأول بمبدأ الوصاية القانونية وكأنه على يقين بأن الجيل الثاني خلق على شرط ان لا يكبر أو يصبح لديه قرار حتى بحياته الخاصة........مثلاً :
الأم : إي اسكتي اسكتي والله هالشب مبين عليه ادمي وابن عيلة وأهله أكابر...ليش بقا يا مقصوفة الرقبة مو عاجبك !!!!
الأب : هادا الناقص....ليكون في شي حدا ببالك حتى ما بدك ياه.....خلص اخرسي و نحن أهلك ومنعرف مصلحتك أكثر منك ..........هادا يلي ناقص والله.........جيل آخر زمان !!!!!!

(((أويهااااااااا.....وقالوا بنتنا ما بتتجوز..... إي تجوزت وفقعت عينيهون... ولي لي لي ليش)))

الأم : وليش بقا لك يامو ما بدكون تجيبوا ولاد هلأ.....لازم تجيبوا...بدي شوف أحفادي....شو عم فهمك أنا امك وبعرف بها القصص......
لنتأكد بأنكون بتجيبوا ولاد ....انتي ما عدتي صغيرة ؟؟..!!

(( لك كرمال الله بدي جملة مفيدة ويفضل تكون منطقية وحسنة المظهر والخبرة مو ضرورية ))



عند يأتي أحد أقرباء أو أصدقاء الجيل الأول لزيارتهم ويكون الجيل الثاني موجود تزداد سخرية الجيل الأول وبيبلشو يا معلم :
- شو لابس !!! تضربوا إنتوا والجينزات متل المهرتكين....
- ولي على كسرت بنات هالجيل
- لك حاجة تجرمي شعرك مثل الحسن صبي البنت حلوة بشعراتها الطوال....
- إي سكوت سكوت شو فهمك انت ..... لساتك ولد والبيضة ما فقصت عنك....
- يوه.....لك كل يلي قرأتيهون كتابين وصايرة مفزلكة ومفكرة حالك فهمانة....
- أي حبيبي جامعتك سهلة وموادك بايخة من شان هيك عم تنجح.....(( أي ركض ))
- طبعاً بدك ترسب لأنك حمار وغبي......
- بحياتك ما حتصير زلمة
- تضربوا وأنتو هـ ألأغاني ........ تفي شو هالذوق
- زبط قعدتك
- زبطي مشيتك
- الله يلعن هالجيل
- شو هالسخافة يلي عم تقرأها
- شو....شو هالتفاهة يلي كاتبها
- ..............الخ................الخ.............. .........لك أأأأأأأأأأأأأأأأأأأخ


بصراحة بدي أعتذر من كل أم وأب
بس حابب قول كلمتين:
بليـز تذكروا إنكون ما خلقتوا أم وأب.....كنتوا أطفال وصرتوا شباب وبعدين وصلتوا لهون
جربتوا...خسرتوا...فرحتوا...بكيتوا...حبيتوا...كرهتو ا...فكرتوا...اخطأتوا...ندمتوا...نجحتوا...
وبالنهاية عشتوا .......
تركونا نجرب ونتعلم.......نحب....ونكره....نطير...نمشي...نزحف... .
تركونا نختار أكلنا تيابنا.......
كيف نحزن......كيف نبكي......صوت ضحكتنا.......
عطونا خبرتكون بس مو تمشونا عليها وإذا طلعنا عن الخط تعدمونا
خلونا نرجعلكون لحالنا.....نرجع لحضنكون....بحب...بشوق....بس مو بخوف
خلونا نكون نحنا متل ما نحنا ونخلق مساحتنا ونعنون أحلامنا.....لنقدر نكون ولادكون مو نسخة مشوهة عنكون......
وتذكروا بأنو في ألنا إيدين نشبكها مع إيديكون.......مو بس راس وبده تكسير
منحبكون....بس إذا قطعتوا عنا الهوا منختنق.....ومنموت

صراع الأجيال من ألاف السنين،وهي سنة الكون.
هلاء يمكن معك حق ببعض الأفكار أو حتى يمكن كل يلي قلتوا بيصير.
بس هاد إحدى نماذج الأهل ومو كل الاهل هيك.
يعني في اكتر من نموذج لعلاقة الاهل بالابناء ،وهاد يلي قراته احدىالنماذج الحية،
ومن شوفه كتير بمجتمعنا،بس بالحقيقة أنا مو عايشته.
ومن شان هيك رح احكي وجهة نظري بالموضوع.
هلاء الجيلين معهن حق،لان ج1 هو الاصل وبنظره هو المسؤول الاول والاخير عن ج2،
ومن شان هيك بيدخل بكل تفاصيل حياتوا ،من باب المسؤلية يعني ما بيكون قاصد يضايق ج2.
بس هي غريزة عندوا ومتل ما بيقولوا (الطبع غلب التطبع ).
_بالنسبة لموضوع الفينة بكير وتلفيون والل.............................................. . الخ.
هي أمور ثانوية وبنقدر نتحكم فيها .والمفروض انو ج2 يعرف كيف يديرها لمصلحتوا.
ومع الوقت كل شي بينحل ،يعني ما رح ينقص شقفة اذا ما كمل الفيلم او .......علما" انو رح ينعاد .
وما رح ينسى يكمل القصة لرفيقوا اذا سكر التلفون،ودخيلك بيعمل أذن من طين والتانية من عجين اذا ما عجبتوا تعليقات ج2.
أما يا عزيزي موضوع الصداقة فهي لعبة الجيلين :
يعني ج1 مفكر حالوا عم يتزكى على ج2 ويوصل ليلي بوا ياه من ابنه وبدون تعب عن طريق هل العبة.
وبنفس الوقت ج2 بيكون كتير مستفيد من هل العبة لان بياخد يلي بدوا ياه منهم وهنن عم يضحكوا ويلعبوا.
(اي والله ج2 برقص ال ج1 على أصابعه وبيقول ما شفت شي )
_أما موضوع القرار فهو بيرجع للشخص نفسه وبختلف من شخص لاخر .
هلاء القرار ناتج عن شو ؟ عن قناعة !أم فرض .
ومن المفروض احترام رأي الأخرين ،ومناقشته،والاخذ بعين الاعتبار (أسبابه ،حسناته ،سيئاته).
والتفكير بالبدائل ،والقدرة على رؤية الموقف بشكل أوسع من أجل الوصول الى قرار سليم بالنهاية.
وبالاخير الامر بيرجع للشخص نفسه ،
يعني اذا مو مقتنع صدقني ما في قوة بتقدر تجبروا على تنفيذوا.
ودائما هنالك نافذة للحل.