جد يا AnaS شو بدك بالحكي سندويشة الهمبرغر ألذ لما بتكون من عرق جبينا
هلأ الكل بيقول هيك وكلنا متفقين على هيك (بكيفنا أو غصب عنا)
وبناءً على ذلك المبدأ حنشتغل أي شي المهم ما نضل قاعدين والشغل مو عيب !!!
بس شو بدنا نشتغل...؟؟؟ ما اتفقنا بأنو الشغل مو عيب ؟؟؟!!!!!



الكثير من الشباب لا يوجد لديهم مانع بأن يعملوا وهم يكملون دراستهم الجامعية
فالطالب مثلاً يدرس الطب ويعمل في غسيل الصحون في إحدى المطاعم
أو يدرس في المعهد العالي للفنون المسرحية وفي الوقت نفسه يشتغل جرسون
هذا طبعاً مو عنا....حصراً بمطاعم فرنسا وايطاليا وهالبلدان...
طيب وهون في سوريا...ليش بينقلب الأمر رأساً على عقب وقبل ما نشرد ونسأل ليش يا زلمة.... خلينا نتذكر قديش منحترم ومنتقبل بعض.... يالزلمة ..!!!

والدة العروس : شو بيشتغل المحروس ابنك
والدة العريس : ((طبعاً بعد ما تصفر وتخضر وتحمر)) والله جرسون بمطعم خمس نجوم
والدة العروس : (( بعد ما تكشر )) والله مافي نصيب !!!!

.....:::: لك له ليش....شو من شان أنو الشغل مو عيب ::::.....



ويبقى الشغل مو عيب بنظر المجتمع...
والمجتمع نفسه يرمي اللوم على شاب تجاوز الـ 20 من عمره ولسعته بينام للضهر وما عم يشتغل شي شغلة (( لك ما الشغل مو عيب ))
ولكن هذا المجتمع نفسه سوف يقول للشاب " لك لك يا عيب الشوم عليك على هالشغلة !! "
وهالشغلة ما بتكون حرامي أو مهرب لا سمح الله لأ.....
بتكون شي شفير تكسي أو شفير سرفيس أو شفير خاص عند شي عيلة محترمة...
مع العلم بأن الشفير الخاص بيرفع منخاره على الشفير العمومي...
والشفير العمومي بيرفع أنفه على غيره.....وعلى رفع أنوف !!!
· الشفير الخاص : بكفي بأني بشتغل عند عيلة أكابر ومعي سيارة مرتبة
· الشفير العمومي : بضلني أحسن من شفير الميكرو...يلي بيطلع أندبورية...
· شفير الميكرو : أي يلاه ما أحلاني قدام شفير باص النقل الداخلي
· شفير الباص : يلاه بكفي أني بسوا راس شفير الهونداية
· شفير الهونداية : بيشوف حاله على شفير الطرطيرة
· شفير الطرطيرة : ما بيقول غير لا تكبر الله أكبر...مسكين مو من شان صوت طرطيرتوا المزعج.....من قهره الطبقي (( يا حرقت موتور قلبي عليك ))



وتنحصر خيارات مهن الشباب ضمن إطار (( الإيع الاجتماعية )) فهناك مهن حرة تقبل بهذه (( الإيع )) معنوياً ومادياً واجتماعياً وإنسانياً لك أي وشو بدك كمان.....
مثلاً مهنة مثل تمديدات صحية تحتاجها جميع البيوت
(( تخيل لو الكل رفضوا يشتغلوا هالمهنة شو كان صار فينا ؟؟؟!!!))
المهم عندما يدخل شي معلم صحية ع البيت ويشتغل بضمير يقال عنه (( والله أنه رجال محترم مع أنه بيشتغل صحية !!! )) ..."ليش المفروض يكون ابن حرام يعني"
أو عندما نرى عامل تنظيفات بالشارع طويل القامة عريض المنكبين (( يعني لوح ))
من دون أي شعور نعلق (شوفي شو شخصية مو حرام يشتغل زبال.....) أأأه حرام طيب مو حرام يضل بلا شغل.....لأ طيب معناها بنكبسوا لتحت وبنضبلوا كتافو....
بعدين لازم كل متوسطين القامات لازم يكونوا حصراً عما نظافة !!!!
أي ببلاد أوربا عمال النظافة أجمل وأنظف من راغب علامة وعمر دياب ؟؟!!!؟!؟!



حتى عندما تكون المهنة تجلب ربحاً مادياً نوعاً ما...تبقى نظرة البريستيج الاجتماعي طاغية عليها...فمثلاً الكثير من الشباب يعملون في محلات الألبسة (( أنا مثلاً)) ومهما كان الشاب فلهوي وطموح وناجح في عمله...سيقابله المجتمع الظريف بعبارة (( أي شقفة صانع))
أأأه أي معلش بس مو كل واحد ورته أبوه شقفة مصنع.....
ولا ينتهي الأمر هكذا بل يضاف إليه التعليق الطيف (( إي ايمت ما بده معلمك بحط رجله بضهرك وبيقلعك ))
لك والله حيرتونا.....حيرتووووووونا



وعندما ندرس في الجامعة ونختص في مجال ما ((وتطلع عيونا بالطول والعرض)) ونتخرج((بعد طلعان الروح)) بيضل في تعليقات رائعة عد يا AnaS على أصابيعك
موظف...ييي الله يحمل معه , قال موظف يا حرام !!!
أستاذ مدرسة......منتوف ودرويش الله يعينه على هـ الشغلة !!!
مهندس كمبيوتر...ييي هالكمبيوتر صاير شغلة يلي ماله شغلة !!!
مهندس معماري...أي دخيلك طول وقته مع المعمرجي...وبين التراب والعفرة والتعتير !!!
مهندس ميكانيكي..ييي طيب ضروري كان يضوع شبابه إذا بده يشتغل ميكانيكي...؟؟
صيدلي...........أي متله متل السمان....عم يبيع أدوية
محامي............كل مصاريه حرام الله يعافينا وشغلته يكذب...الكذب صار شغل !!!
كابتن طيران......هههه شفير طيارة
مضيف بالطيارة....ييي يعني كرسون بالطيارة
طبيب .............ييي يروح يشتغل بياع فلافل أشرف له ما في أكثر من الدكاترة
طبيب بيطري......خخخخخ عيادته مثل الزريبة
طبيب نفسي........شو هالجنان...أكيد هاد واحد معقد من هو وصغير



لا أحد يحترم مهنة أحد....
ولا أحد يسمع أحد....
خالتي مثلاً بتتمسخر على الخياطة من وراها....بس بتترجاها ما تتأخر بالفستان
الخياطة بتتمسخر على بنت شفير التكسي....وبتوصي الشفير على غراض
شفير التكسي يرفض بأن يزوج ابنته لابن الضابط......ولكن يتحامى به
ومرت الضابط بتتمسخر على زوجة اللحام....وبتوصي اللحام على كيلو لحمة
وزوجة اللحام بتتمسخر على جارتها الكاتبة.....وبتستشيرها كمثقفة
والكاتبة تنظر باحتقار للتاجر....وتطلب منه تمويلها
والتاجر يهزئ من الدكتور النفسي.....ويزوره سراً
والدكتور النفسي بيضحك على الممثل وبيتقل عليه دم....وبيحضرله أعماله
والممثل يستخف بالصيدلي...وبيشتري الأدوية من عنده
والصيدلي من المهندس.....يلي عمرله بيته
و...و...و....و....و......الخ يعني كل مهنة غير مهنتنا تافهة وغبية وشرشوحة
طيب شو رأيكن نشتغل كلياتنا وزراء ؟؟؟
شو جد عم نحكي شو يا AnaS !!!
ولا ألك مو نصيحة يوم لتحت ويوم لفوق...والكل بده يطقطق براغي....بلاها
طيب لاقونا شي مهنة ما رح تلاحقها شي علة ؟؟؟؟
....... ...... ...... ..... شو !!؟!؟! شو هالمهنة هي ؟!؟!؟!؟!

والله هو الشغل مو عيب مادام بالحلال بس الله يكبر عقولنا

والله متل ماقلت إذا ماكان عنا عمال نظافة يمكن كنا طفنا - أجلكم الله - ومع هيك نظرتنا لهالطبقة دونية ومتلو متايل

يعني لا إن اشتغل خلص وإذا مااشتغل مابيخلص

الله يصلح تفكيرنا يارب

مشكور عالموضوع عنجد كتير حلو

الله يعطيك العافية