بسم الله الرحمن الرحيم
السلام عليكم ورحمة الله وبركاته
كان عندي ست الله يرحمها من الرعيل الأول عاصرت أيام السفر برلك
المهم بلا طول سيرة كانت كل ما تجي تزور عنا بالبيت نعد حوليها لنسمع منها قصص وحكاييا كانت حافظتهن من أيام الكتّاب وكنا نعد انسجلها هلقصص بصوتها
من فترة كنت عم ضب بعض أشرط الكاسيت أم شفت الشريط يلي كنا نسجل عليه وحطيتو واسمعتو واترحمت عليها وأريتلها الفاتحة وحبيت أنو شاركن بهي القصص و الأشعار
أرجو من كل من يقرأ الموضوع قراءة الفاتحة لروحها الطاهرة

هاد دهليز كان ينقال قبل الحكاية, طبعا لكل حكاية في دهليز شكل (شي شعر شي قصة وشي حكمة)
تقصدت أكتبو متل ما لي سمعانو مشان يعطي المعنى المظبوط وبنصح أن تعيدوا القراءة أكتر من مرة مشان الاستمتاع فيه بعد ما تاخدو على قرأة الكلمات:
الدهليز
أوموا اسمعو على ما جرى في أديم الدهر
رجل تاجر يرعى على رياض الزهر
نصب فخو واتخبا بجنب النهر
نصب فخو واتخبا بجنب العين
وصاح وين يلي ما يصيبو ضيم
حصة من الزمان مأبل عليه طير
منآرو شبيه السيل
نأر حبة بعد حبة زخ
لحتى صفية حبة بتم الفخ
أللو الصياد أرّب وانأرها لسميك سيد كل الطير
وأرّب العصفور بسرعة وصار جوّا الفخ
أللو رميتني يافخ يا غدار
يلي إلي بالأوكار تلت أولاد لحم بلا أرياش
ألو اوأعت يا عصفور يا زنديأ
يلي لمن اتزأزأ ترمي بألبي لهيب وحريق
والله لأعمل عليك كل لون بزي
وأيضا رز مفلفل يكفي كل من بالحي
ولأعمل من ريشك طراريح ومخدات
وأيضا مصارينك للغنا أوتار
ومنائيرك مزاريب للأمطار
صفن العصفور


أللو إيـــــــــــــــه
إحلم أيها الصياد
شو اطلعت فيل
لما بأرة بني إسرائيل
حتى تفصل مني هكذا التفصيل
أللو أنا سيدي الباز
معلمني علطلسة والطـّلاس
وعلى كنوز بتحير الأفكار
ولما سمع الصياد بالمال
الروح منو شردت والعأل من طار
وأرّب بسرعة وفتح باب الفخ
و يا فرحة العصفور لمن شاف حالو طار
وأ ّف على غصن من الأغصان يتفلى
أللو عجل بالمال ياسيد الأطيار
أللو والله لو دبحتني لأيت بألبي حبة لولو وحبة مرجان
أللو لا بد ما تأع بالأفص تان
أللو لا وحياة واحد الأحد المنان
يلي أخبر طيور العرش مع طيرو الجان
على فخ منصوب بكزا بستان
لحتى كان
وكان ياما كان في أديم الزمان...........
وهون بتبلش الحكاية
أرجو أن تنال الإعجاب ولوكان في إمكانية أنو حولها لـلكمبيوتر كنت حملتلكن ياها علموقع
لاتنسونا من الدعاء ولا تنسوا صاحبة الشعر من الفاتحة لروحها الطاهرة
هناك المزيد..........