::هـيـك بــدو زوجـــــي ...::

fou fou · مشاركة رقم : 1 (permalink) 19-08-2008, 11:08 PM

احبابي

بينما أنا في المستشفى أتلقى العلاج في أحد الأيام
حصل معي أمر لا أدري كيف أنقله لكم

ولكن سأورده لكم كما شهدته

بينما أنا واقف في طابور الدور عم استنى الإضبارة تبعي لحتى تتطلع
من الأرشيف ( طلعت روحي ولسا ما كانت تطلع الإضبارة )

كانت الناس عم تتدافش على الطابور وأنا بحكم مرضي وأنو النوبة كانت جاييتني
قلت يا ولد انضب على جنب وبلا فضايح
وبلشت النوبة تشتغل شغلها
الله لا يورجيكم عرق ودوخة وانحلال مفاصل
كلو هاد من الآثار الجانبية من العلاج

المهم وبلا طول سيرة
لفت نظري تنتين نسوان واقفين على جنب يعني فيكم تقولوا بعمر التلاتينات
وحدة منهم ما شاء الله عليهم حاطة شي عشرة كيلو مكياج على وجهها
ولابسة من هاد البنطلون البخ وقميص ضيق وقصير

والي واقفة معها عين الله تحرسها
حجاب شرعي كامل ومانطو

المهم أنا كنت عم اطلع عليهم لأنو متل حكايتي كانوا عم يستنوا الإضبارة تبع مريضهم

وبينما نحنا واقفين ما بلاقي غير اجا دكتور من المستشفى ووقف معهم

أنا بطبعي حشوري وخاصة بالنسبة لهيك أمراض فقلت يا ولد سماع شو عم يحكوا
مشان تعرف شغلات جديدة
فكان الحوار كالتالي:
الدكتور: مرحبا
المرأتين: أهلين دكتور
الدكتور: كيف هال مريضكم؟
أي هال ومو حال لأنو طلع الدكتور أجنبي وجاية لهون مشان يساعد الأطباء بعلاج المرضى
المرأتين: الحمد لله ماشي الحال

الدكتور بنظرة فيهما كثير من الغموض والحيرة: ممكن أسألكم سؤال؟
المرأتين : تفضل دكتور
الدكتور: هل أنتم تقربون بعض؟
المرأتين : أي دكتور نحنا اخوات
الدكتور: فلماذا أختكي تضع الحجاب وأنتي لا تضعي الحجاب؟

هون أنا اداني شغلتهم مشان اسمع جواب المرأة المحجبة الغيورة على دينها وانبسطلي شوي مشان انسى الألم

المرأة المحجبة بعد سكوت فترة قصيرة من الزمن:
( والله يا دكتور هيك بدو زوجي )

هيك بدو زوجي ؟؟؟ هيك بدو زوجي

والله يا جماعة وقت سمعت الجواب اجاني ألم فظيع صدقاً ما عرفت الألم من المرض ولا من جواب المرأة

هون الدكتور قال:
ليش أنتي مالك مسلمة؟؟؟

المرأة المحجبة : امبلى مسلمة؟
الدكتور: والحجاب مو فرض عندكم بالإسلام؟
المرأة المحجبة: نعم فرض

هون الدكتور ضحك ضحكة ساخرة فيها كثير من التعجب
ومشي بحال سبيلو
أنا بعد ما شفت القصة
اجيت لعند النسوان التنتين
قلت للمرأة المحجبة : طول مافي متلك في مجتمعنا رح يضل بناتنا يتفرجوا على المسلسلات التركية والأغاني والانحلال
ورح يسخروا فينا أعدائنا ويعرفوا أنو مالنا حول ولا قوة
الله يهديكي يا أختي ويصلحك

وحملت حالي ومشيت وهي طبعاً ما عرفت شو قصدي بهاد الكلام ولا لشو بهدف وكانت واقفة مسطولة من الكلام تبعي
بس متل ما قالت
هيك بدو زوجي...

تحـــيــاتـــي ...

HEV14 · مشاركة رقم : 2 (permalink) 19-08-2008, 11:18 PM

مممممممم
حاطة الحجاب لترضي زوجها
فعلا وصلنا لوئت
الماسك على الدين متل الماسك على جمرة من النار
الله يهديها ويهدي كل وحدة مو مقتنعة بحجابها
يسلمواااااااا أم الفوف

fou fou · مشاركة رقم : 3 (permalink) 19-08-2008, 11:58 PM

هاد حال أكتر النساء .... الله يهديهون ويصلحون ....

مشكورة لمرورك هيفو ..

تحياتي ...

صاحبة الحزن · مشاركة رقم : 4 (permalink) 20-08-2008, 02:33 AM

في كتير نسوان وبنات هيك
بس بقول الله يهدي الجميع
يسلموو فوفو
كل الحب والاحترام

fou fou · مشاركة رقم : 5 (permalink) 20-08-2008, 09:35 AM

آمين يارب ... ويفتح بصيرتهم ...
مشكور صاحبة الحزن للمرور .... عاش مين شافك ...

تحياتي ..

ABO OMAR · مشاركة رقم : 6 (permalink) 23-08-2008, 03:56 PM

لا حول و لا قوة إلا بالله ....... لا تعليق

مدحت · مشاركة رقم : 7 (permalink) 23-08-2008, 05:56 PM

لا طاعة لامرئ في معصية الله
بس مدام هيك بدو زوجها اذا زوجها رجل فهمان اما بالنسبة لجوابها فهاذ برجع الها والله يهديها
مشكورة فوفو على القصة...

Bassamo · مشاركة رقم : 8 (permalink) 23-08-2008, 07:18 PM

الله يسترنا من شي أعظم

أغلب الفتيات تجعل الحجاب سترا لهن أمام الناس فقط

fou fou · مشاركة رقم : 9 (permalink) 24-08-2008, 11:38 PM

بالفعل وهاد مثالحي بمجتمعنا... الله يهدي فتياتنا ....

مشكورين للمرور ...

تحياتي ..

طائر الأماني · مشاركة رقم : 10 (permalink) 10-09-2008, 04:43 PM

طيب اوكي هيك بدو جوزا

ليش هي هيك عم تحكي متل الي غصب من عنو عم يعمل الشغلة