السلام عليكم ورحمة الله وبركاته



كيفكن يا أعضاء اللايف نت شو أخباركن ؟؟

أنا بدي أسألكم سؤال ..........


مين فيكم مئدم بكالوريا ؟؟ وشلون تجربته معها يحكيلنا شوي

الحئيئة أنا السنة عندي بكالوريا علمي ووالله والله ميتة من الرعبة لاء وخاصة بعد ما حطولنا الفرنسي بالمنهاج ورح يدخل معنا بالفحص أكيد اهئ اهئ عنجد نزعولنا مراءنا

أمانة يلي فيكم مئدم بكالوريا وجايب نتيجة منييييييييييييحة كتييييييييير يحكيلي شو السر وشو بتنصحوني ؟

أنا خايفة كتير كل أهلي بيقولوا لي بدك تطلعي دكتورة ليش قال لأني شاطرة بالسنين الماضية بس أنا برأيي البكالوريا مو متل أي صف من الصفوف عنجد انها مرحلة كتير صعبة وأنا من طول عمري الأولى على صفي أو التانية ولا مرة كنت غير هيك بس والله ما بعرف شو بدي احكي عن الصعوبة يلي عنا ببلدنا أنا كتير كتير خايفة والمدرسة بعد بكرة مالي حابة شوف شي اسمه كتب

والله والله وقت شفت الكتب ارتعبت كتير وخفت كتير كل كتاب 300 أو 350 صفحة هادا ما عدا الانكليزي كتابين جدد + الملحق يلي بس للعلمي كلو نصوص طويلة وكلمات صعبة لاء ومرسوم عليه من برا رجل فضاء كمان يا حبيبي

ولا تنسوا الفرنسي هالمصيبة الجديدة يلي اجتنا عالبارد المستريح ما كانت لا عالبال ولا عالخاطر ونحن بكل السنين ما منفهم ولا كلمة من الفرنسي منحفظه حفظ لحتى نجيب فيه علمات وبس والآنسات كمان أنا كنت حاول أفهم عالآنسة بس المادة عنجد صعبة مدري الآنسة ما بتعرف تفهم شي والبنات عندي بالصف ما حدا حاططلوا اعتبار بنوب بنوب وكل حصص الفرنسي مشاغبة ولعب ومرة من المرات أنا ورفيقتي في درس بالفرنسي هديك السنة كان صعب وقلنا أحسن ما نحفظه منفهمه فهم ومنعرف لحالنا نجاوب عالأسئلة أحسن يعني من الحفظ لأنو بالفحص عنا فرنسي + عربي (( ههه يا عيني يا هيك الفحص يا أما بلا )) وجربنا فهمنا شوي عالآنسة وبدنا نكمل فهم آم قلنا للآنسة أنه هي الشغلة ما فهمناها وعادتلنا ياها بس عبثا ولا كلمة فهمنا آم تصوروا أنو الآنسة قالتلنا اي احفظوها حفظ لكن يعني شي عااااااااااادي جدا

عنجد بس لفكر بالبكالوريا بينطوش راسي وما بحسن أبداً بقوم بئيمها من بالي بسرعة
بس المشكلة لأيمتى بدي ضل آيمتا من بالي ليكا المدرسة أجت وما صفي شي




أمانة كل مين يفوت يرد عليي وينصحني شي نصيحة كتير حابة استفيد من تجارب غيري


وأمانة كمان كل مين بيقرأ الموضوع أنويدعيلي أني جيب علامات متل ما بدي
لأني عنجد وبإذن الله رح اعمل كل جهدي وأتوكل على الله


آآآآآآآه كنت حابة فش قلبي واحكي قلت ما في غير اني احكيلكن الله يعيننا ويعين كل مين عندو بكالوريا وكل مين بيقدم بكالوريا ببلدنا لأنه فعلا غير عن كل الدول

وشكرا الكن مقدما يا اعضاء اللايف نت